„მობილური იუსტიციის სახლი “ უკვე სამცხე-ჯავახეთის რეგიონის მოსახლეობასაც მოემსახურება.

„მობილური იუსტიციის სახლის“ გეოგრაფიული არეალი გაიზარდა. დღეიდან ის სამცხე-ჯავახეთის ხუთ სოფელსა და მათ შემოგარენში მცხოვრებ 10 000-მდე მომხმარებელს 470-ზე მეტ სერვისს მიაწვდის.

„მობილური იუსტიციის სახლის“ ახალმა ავტომანქანამ პირველი სერვისი ბორჯომის მუნიციპალიტეტის სოფელ ტაძრისის მოსახლეებს მიაწოდა. მომსახურების გაცემის პროცესს პირადად აკვირდებოდნენ იუსტიციის მინისტრის მოადგილე ერეკლე ღვინიანიძე, სსიპ „იუსტიციის სახლის“ თავმჯდომარე ლაშა ლობჯანიძე, სამცხე-ჯავახეთის გუბერნატორი ბესიკ ამირანაშვილი, ბორჯომის მუნიციპალიტეტის საკრებულოს თავმჯდომარე დავით ზაალიშვილი, ქალაქის მერი ოთარ არბოლიშვილი და საკრებულოს წევრები. მათ მოქალაქეებს „მობილური იუსტიციის სახლის“ სერვისების ხელმისაწვდომობის შესახებ ინფორმაცია მიაწოდეს.

„მობილური იუსტიციის სახლი“ იუსტიციის სამინისტროს ინოვაციური პროექტია, რომელიც სახელმწიფო და კერძო სექტორის 470-ზე მეტ სერვისს სთავაზობს იმ ათეულობით სოფლის მცხოვრებთ, სადაც იუსტიციის სახლები არ ფუნქციონირებს.